عبيد (مينا أبو الدهب) هو إيد ماجد اليمين (محمود حميدة)، مدير دار الشمس للأيتام. طول الوقت موجود في الصورة، ساكت، وبينفّذ أوامر ماجد من غير نقاش. بس من الواضح إن جواه صراع كبير، حاجة كتمها سنين ووصلت لمرحلة إنه يفكر في الانتحار!
المسلسل بيفتح ملف من الملفات التقيلة جدًا، استغلال الأطفال في دور الأيتام. الظاهر قدام الناس إن ماجد راجل خير، بيساعد الأطفال ويوفر لهم حياة كريمة، لكن الحقيقة غير كده تمامًا! وعشان كده ولعة (أحمد مالك) ومفتاح (طه دسوقي)، اللي كبروا في الدار دي، قرروا يتمرّدوا على الوضع اللي عاشوه ويفضحوا الحقيقة!
عبيد وحب عمره في الدار
في وسط الظلم والقهر اللي شافه عبيد في دار الشمس، كان فيه شخص واحد بيحس معاه بالأمان… أمينة (دنيا ماهر)، من وهو صغير، وهي بتمثّل له كل حاجة حلوة في حياته، الشخص اللي كان بيحس معاه إنه بني آدم بجد، مش مجرد رقم في الدار، كان بيحبها بجد.. أمينة مش مجرد زميلة لعبيد في الدار، دي الشخص الوحيد اللي حسّسُه بالونس. كانت بتهوّن عليه الأيام الصعبة، بس في نفس الوقت، هي نفسها عايشة صراع كبير… اتعودت إنها تحمي نفسها من أي مشاعر ممكن تضعفها، لأنها عارفة إن حياتهم مافيهاش ضمانات، وكل لحظة ممكن الدنيا تسرق منهم اللي بيحبوه.
لحظة محاولة الانتحار… أمينة أول حد خاف عليه
لما عبيد قرر ينهي حياته، أمينة كانت أول واحدة تحس إن فيه حاجة غلط. كانت قريبة منه كفاية عشان تلاحظ إنه مش طبيعي، وإن فيه حاجة تقيلة عليه. ولما لقتُه في اللحظة دي، ماقدرتش تسيبه، جريت على بابا ماجد (محمود حميدة) وبلغته، لإنها مش قادرة تتخيل إنه يختفي من حياتها فجأة.
اللحظة دي كانت واحدة من المفاتيح اللي فهمتنا شخصية عبيد أكتر. الحب بالنسبة له ماكانش مجرد مشاعر، كان محاولة للخروج من الدوامة اللي عايش فيها. دور “أمينة” بيسلط الضوء على التحديات التي بتواجهها البنات في دور الأيتام، وكيفية تعاملهم مع الضغوط الاجتماعية والنفسية، كمان بتُظهر العلاقة بينها وبين “عبيد” الأبعاد الإنسانية والعاطفية التي بتنشأ في بيئة قاسية زي دي.
السؤال هنا بقى… عبيد كان جزء من الظلم ده ولا كان مغلوب على أمره؟ وهل أمينة ضحية برضه؟ ولا شايفة الصورة أوضح؟
*عن مينا أبو الدهب
مينا بدأ شغفه بالتمثيل والفن من زمان، تحديدًا سنة 2004، لما وقف لأول مرة على مسرح كلية الآداب – جامعة بنها. بعدها اشتغل في قصر ثقافة بنها، وفضل مكمل في طريقه لحد ما جات له الفرصة في 2019، وشارك في أول أدواره في الدراما من خلال 3 مسلسلات:
لمس أكتاف
فكرة مليون جنيه
بدل الحدوتة تلاتة
